Gia dapi in onn tschertgan ils possessurs dal hostel cun bar e chasa da giasts Nangijala a Mustér in cumprader. Ils giuvens possessurs svedais vulan numnadamain far insatge auter. Cun Stefanie Schmid datti ussa in'interessenta.
«Per mai èsi in siemi»
La giuvna da 36 onns vegn da l’Argovia e lavura dapi 10 onns sin quest sectur. Ella saja stada l’emprima collavuratura dal Nangijala ed haja lavurà duas stagiun là: «Jau hai gia lura pensà, sch’els vulan ina giada vender, lura vuless jau gugent surpigliar il manaschi, perquai ch’igl è simplamain in bischu. Per mai èsi in siemi.»
Tschertgar investiders
La summa da cumpra na vegn betg communitgada. Scrit ora eran ils objects ina giada per 2,1 milliuns francs. Sco Stefanie Schmid ha dentant tradì saja la summa da cumpra pli bassa. Mo tuttina na saja quai betg simpel da vegnir tar il chapital agen ch’è necessari per puadir cumprar ils objects ed uschia tschertga Stefanie Schmid investiders tenor il principi da crowdfounding. Investiders da plirs millis francs survegnan in bon per far vacanzas en il Nangijala cun ina valita pli auta. Investiders da 50’000 francs mettan a disposiziun ils daners per tschintg onns fix ed suenter vegnan quels daners pajads enavos aifer 7 onns. Quai tar in tschains da 2 pertschient. Sco Stafanie Schmid di, haja ella gia gì success. Ella haja dentant anc da tschertgar investiders per minimum 100’000 francs.
Naginas grondas midadas
Sin la stagiun d’enviern quinta Stefanie Schmid da pudair surpigliar il hostel cun bar e la chasa da giasts, che cumpiglia en tut 17 chombras cun total 47 letgs.
Investiziuns na quinta ella betg da far e perquai na vegn era betg bler a sa midar. «Jau hai gugent l’atmosfera dal Nangijala. Jau hai gugent quai sco igl è ed uschia vegni segir a dar il cumenzament mo fitg pitschnas midadas» di Stafanie Schmid. A lunga vista ha ella dentant avunda ideas. Ina fiss d’expander e l'autra da far ord Nangijala ina marca.
RR actualitad 11:00