Siglir tar il cuntegn

Header

cuntegn

Perscrutaziun Adina pli paucs peschs en il Rain Anteriur

Dapi onns sa reducescha la populaziun da peschs. Pertge che quai è uschia n’è betg enconuschent. Per recaltgar enconuschientschas ha l'Uffizi da chatscha e pestga dal chantun Grischun lantschà in project da perscrutaziun. Perquai ha l'uffizi incaricà l'institut Hydra da Constanza.

In’emprima part da la lavur pratica en e sper l’aua ha l'institut fatg il venderdi passà. En il Rain a Vuorz, Zignau e Surrein è vegnì pestgà cun agid d’anodas (impuls electrics) sin lunghezzas da mintgamai 200 meters. Sco quai ch’il manader da la surveglianza da pestga da la Surselva, Roland Tomaschett, di, vegnan dus ulteriurs tschancuns a Mustér, respectiv Tujetsch examinads en il decurs da las proximas emnas.

Ils tschancuns avain nus tschernì tenor differents criteris. Nus avain tschertgà lieus cun differentas structuras, pia ina schelta represchentativa per las cundiziuns che nus avain pertutgant topografia u era ecomorfologia.
Autur: Roland Tomaschett manader surveglianza da pestga Surselva
Per tadlar curt e cumpact
ord RTR Audio dals 15.02.2022.

Lavur sur trais onns

En pliras parts dal project che suondan ils proxims radund trais onns vegnan fatg differentas examinaziuns. L'institut Hydra vegn ad intercurir l’aua u era la vivonda en quella, pia per uschè da dir l'entir sistem biologic dal Rain. In factur che vegn sut la marella è era il quantum d’aua e las temperaturas da quella.

Cun resultats concrets dal project quinta l'Uffizi da chatscha e pestga pir en radund trais onns. Il project lantschà en Surselva è unic.

La firma HYDRA

Avrir la box Serrar la box

Il manaschi Hydra a Constanza è dapi il 1987 in manaschi reunì da plirs instituts e biros spezialisads. Quella rait da servetschs e perscrutaziun dispona da gronda cumpetenza sin il sectur da l’aua e l'ambient. Las filialas da Hydra a Constanza e Son Gagl èn partenaris d’universitads, posts spezialisads e fatschentas da la Germania, Svizra, Austria, Liechtenstein e l'Italia. Ils spezialists cusseglian era cumissiuns per la protecziun da las auas, parcs naziunals e manaschis privats en dumondas da l’ecologia da l’aua e dal niz da quella.

Latiers tutgan monitorings da la biologia, controllas da l'effect, concepts e perscrutaziuns da l’ecologia dals peschs, revitalisaziuns da flums u era projects cunter aua gronda. La sanaziun da la forza idraulica per exempel cun dumondas da l’aua restanta tutga tar las cumpetenzas da quella rait. Vidlonder vegnan lavurs da sfunsar, roboters sut l’aua e sgular cun dronas.

RTR actualitad

Artitgels legids il pli savens

Scrollar a sanestra Scrollar a dretga