A Vella a la staziun da val prepara Petra Derungs las sutgeras per ils giasts. Igl è bell'aura ed uschia quinta ella cun blera glieud. Plinavant han ils uffants da las scolas da skis da la Surselva oz ina cursa en il territori.
Cura che tuts èn sidora, sa metta era Petra Derungs sin via en las autezzas. Sco emprim vegni fatg las controllas dal di: Ir sin pista e mirar sch'ils pals da lain e las tablas stattan anc e sche las raits èn anc entiras. Sco patrugliadra stoppian ins esser segirs sin ils skis, di Petra Derungs che fa quella lavur dapi 30 onns.
Ils otg patrugliaders dal territori da skis da Sursaissa/Mundaun lavurian stretg ensemen cun ils lavurers da las sutgeras, di la dunna da 51 onns. Perquai surpiglia ella era adina puspè l'incumbensa da survegliar las sutgeras. Quai saja forsa ina da las lavurs in zichel pli lungurusas, ma damai che quai cuzzia be mes'ura, saja quai schon en urden, di Petra Derungs. Il pli bel saja per ella, da pudir esser l'entir di en il liber.
Igl è belleza dad esser l'emprima e la davosa ch'è sin pista. Uschia ves jau bleras giadas la levada e la rendida dal sulegl.
Ina part da sia lavur è dentant era da porscher agid a skiunz e snowboardistas blessadas. Era quai di hai dà in accident nua che Petra Derungs à vegnida clamada. In um che giava cun aissa è crudà per terra e ha dischlocà la spatla. La Rega ha transportà il pazient en l'ospital. Ils dus patrugliaders han silsuenter stuì notar tut las infurmaziuns en in cudeschet. En intgins dis vegnan els a s'annunziar tar l'um e dumandar sche tut saja en urden. La scolaziun da patrugliadra ha Prisca Derungs fatg tar las Pendicularas Svizras.
Il suentermezdi passa senza plirs accidents ed uschia po la dunna ch'abitescha a Vella studegiar vid las incumbensas da la saira. Ella fa numnadamain anc ina giada ina controlla e guarda che tut ils osps sajan davent da la pista.
La patrugliadra è cuntenta cun il di da lavur, che las pistas èn stadas bellas e segiras. E per che quai restia uschia, audan ins gia da lunsch las maschinas che preparan las pistas per damaun.