Ir a tagliar pignols da Nadal en il guaud, e lura vender quels als indigens. In usit che l’Uniun da giuventetgna Rabius tgira gia dapi onns. Ma era sche lur clientella spera sin bels pignols, sco quai ch’ins enconuscha da las reclamas, la realitad, u la natira, è per il solit in zichel autra: Qua u là magher, in zic crutsch, u cun in piz massa lung. Chattar pignols ideals è per la giuventetgna mintg’onn ina sfida.
La glieud sa che nossa pignola che stat la fin finala tar els en stiva ha forsa betg plazza per bleras cullas.
Ina sfida che tant la giuventetgna sco era ils clients piglian in pau cun umor. La fin finala vai per l’uniun plitost da pudair passentar in bel di ensemen. E per quels da Rabius è quai ina pussaivladad da sustegnair in zic l’Uniun da giuventetgna e d’avair in pignol indigen en stiva. E quai perduna per part era il stadi dal pignol mintgatant plitost mediocher.