Placats da reclama da fatschentas austriacas

Enstagl dals placats da reclama dals sponsurs da ballape da l’Uniun Sportiva Schluein Glion vegnan montadas reclamas dals sponsurs da l’equipa naziunala da l’Austria.

Las reclamas indigenas èn cuvertas cun taila alva. Bild in Lightbox öffnen.

Legenda da maletgs: Las reclamas indigenas èn cuvertas cun taila alva. RTR, C. Albin

Tge reclamas ch'èn montadas enturn il plaz da ballape decida l’organisatur d’in gieu da ballape. L’organisatur dal champ da trenament e dal gieu amicabel da la naziunala austriaca encunter l'Uniun Sportiva Schluein Glion è la destinaziun Flem Laax Falera.

Perquai che la destinaziun ha sustegnì finanzialmain il nov plaz da balla a Schluein ha ella il dretg da duvrar quai plaz. Las reclamas actualas da las fatschentas indigenas èn cuvridas cun tailas alvas. Enstagl da quellas ha la lia da ballape austriaca pretendì che las reclamas dals sponsurs da l'equipa naziunala vegnian montadas.

Nagin problem per ils sponsurs existents

Per ils sponsurs indigens è quella situaziun dentant betg in grond problem, sco Martin Casutt conferma. El è il manader da fatschenta da l'interpresa da bajegiar Casutt e sponsur principal dal club da ballape. Els sajan infurmads da quella midada e sch’els sappian gidar il club cun desister da lur reclama, saja quai nagin problem. La finala saja quai ina schanza unica per il club e per la regiun Surselva.

RR actualitad 11:00