Siglir tar il cuntegn

Header

cuntegn

Plaiv Breil Sanaziun dal fresco da Sogn Cristoffel

L’entira baselgia parochiala da Breil vegn renovada e sanada ils proxims onns per ina summa da total 1,25 milliuns francs. Ina part da la sanaziun cumpiglia il fresco da Sogn Cristoffel che figurescha sin il clutger da la baselgia. Quella custa total 55'000 francs. Per vegnir tar quella summa ha la cumissiun da bajegiar da la plaiv fatg in filmin e publitgà el sin la plattafurma da Youtube.

Grond resun sin il filmin

La cumissiun ha survegnì fin uss sulet resuns positivs sin il fimin e bleras persunas hajan era gia guardà il film, di Annadora Friberg che fa part da la cumissiun da bajegiar. Per alura pudair era finanziar la sanaziun è l’entir fresco da Sogn Cristoffel vegnì partì en 220 parts e ina da quellas parts po uss vegnir cumprada sin la pagina d’internet da la plaiv da Breil. Fin uss eran dapli che 20 parts vegnidas vendidas.

Fresco è vegni chattà pir 1963

Il fresco da Sogn Cristoffel sin il clutger baselgia è vegni a la glisch pir tar l’ultima renovaziun e l’engrondiment da la baselgia il 1963. E uss quasi in mez tschientaner pli tard basegna el urgentamain d’ina sanaziun. Las lavurs duajan cumenzar, sche tut va bain, la primavaira 2020. La cumpart, vid ils 1,25 milliuns, che la plaiv ha da purtar ord agens meds, munta a 400'000 francs. Per sminuir quella cumpart, ma era per integrar l’entira plaiv en la sanaziun è quella acziun vegnida lantschada, di Annadora Friberg. Uschia possia mintgin vesair nua che ses daners èn ids ed era sa sentir sco ina part da la cuminanza e quai saja l’idea da basa per ina plaiv, accentuescha Annadora Friberg.

RR actualitad 11.45