Siglir tar il cuntegn

Surselva Plans per in hotel da cura a Mustér

A Mustér duai dar sper il hotel Disentiserhof in hotel da cura cun letgs da reabilitaziun per mals da reuma e musculs. Il hotel duai avair 50 enfin 60 chombras ed esser en la categoria da 3 fin 4 stailas.

Rolf Engler
Legenda: Rolf Engler vul bajegiar sper il hotel Disentiserhof a Mustér in Hotel da cura. RTR, G. Hosang

Sco Rolf Engler, dal cussegl d'administraziun da la Disentiserhof Betriebs AG ha ditg a Radiotelevisiun Svizra Rumantscha vegn quintà cun custs da 20 milliuns francs e var 60 plazzas da lavur novas a Mustér. La finamira è ch’il hotel daventa commember da l’Associaziun da bogns curativs e la finala era vegnir sin la glista da spitals dal Grischun, declera Rolf Engler. Cun il hotel da cura quinta el da pudair occupar fitg bain l’hotel durant l’entir onn e betg mo durant las stagiuns autas.

Disentiserhof fa mintg’onn deficit

Ch’ins vul puspè ir enavos tar las ragischs dal vegl hotel Disentiserhof ch’è stà davent da sia avertura 1887 fin ch’el è vegnì disfatg 1978 in hotel da cura è fitg simpla. La Disentiserhof Betriebs AG fa mintg’onn in deficit cun il hotel Disentiserhof. Quai perquai ch’il hotel sez po disponer be da var 25 da total 157 abitaziuns da vacanzas. Vul dir, la gronda part dals possessurs d’abitaziuns na metta betg a disposiziun lur abitaziuns al hotel cura ch’els na dovran betg ellas. L’entir cumplex è uschia occupà fitg mal ed ils custs d’infrastructura na pon uschia betg vegnir cuverts. Cun il nov hotel pudess l’infrastructura existenta vegnir nizzegiada meglier ed ils custs pon vegnir cuverts declera Rolf Engler.

Planisaziun locala

Per ch’il hotel possia dentant vegnir bajegià sper il hotel cun abitaziuns existent, dovra quai dentant ina revisiun da la planisaziun locala. Davart quella vegn il pievel da Mustér probabel a votar l’october. Sche questa vegn approvada ed i va tut senza incaps pudess l’hotel esser construì sin la fin 2018.