Siglir tar il cuntegn

Header

audio
Laax: Il chastè emblidà da Lagenberg
Or da Total local dals 09.11.2021.
laschar ir. Durada: 3 minutas 36 Secundas.
cuntegn

Platta Pussenta Laax: Il Chastè emblidà da Lagenberg

Il chastè da Lagenberg tranter il vitg da Laax e Laax Murschetg è vegnì restaurà – almain ils mirs che guardavan anc ord il terratsch.

La fin dal 13avel tschientaner è il chastè da Lagenberg vegnì construì dals Habsburgais. Quai ha era ina dataziun da radio-carbon mussà ch'è vegnida fatga cun laina ch'ins ha chattà en e sper ils mirs dal chastè. Il servetsch archeologic e la tgira da monuments dal Grischun han perscrutà e sustegnì la renovaziun da las restanzas da quest chastè. La fundaziun «Platta Pussenta» ha instradà la renovaziun ed è da sia vart vegnida sustegnida da la Pro Laax. Ils 60'000 francs per quella lavur ha la Pro Laax pajà.

Atgnadad europeica

Il duca che administrava il chastè era in duca senza terra. Uschia insatge na devi betg en il rest da l'Europa sut ils Habsburgais. Il duca aveva sulettamain il dretg da dretgira sur questa regiun ed el protegiva cun sia schuldada la fiera da Laax. Uschia ha Corsin Caduff, anteriur scolast da Laax, introducì l'istorgia dal chastè da Lagenberg.

Bler dapli anc sut il terratsch

Fin ussa è be ina pitschna part dals mirs da l'anteriur chastè vegnida renovada. Las perscrutaziuns cun radar geologic han mussa ch'il chastè sin la costa tranter Laax e Laax Murschetg è bajegià sin pliras plattafurmas en la lunghezza da la costa Lagenberg. Quai ch'è fin ussa zappà sut mistgel e terratsch duai era restar là. Ins ha mo restaurà là nua ch'ils mirs guardavan anc siador e fissan uschiglio ids en paglia. Far liber tut ils mirs ch'il servetsch archeologic ha chattà, fiss era ina dumonda da custs. Quai giaja spert en plirs 100'000 francs, di Murièle Jonglez la mainafatschenta da la fundaziun «Platta Pussenta». Ils mirs ch’en ussa visibels, sajan il cumpromiss che tut ils pertutgads hajan acceptà.

RTR Total local 11:45

Artitgels legids il pli savens

Scrollar a sanestra Scrollar a dretga