Siglir tar il cuntegn
Inhalt

Surselva Pli pauc energia pervia d’in atun ed in enviern sitg

Las Ovras electricas Rain anteriur e Glion han producì pli pauc energia l’onn da fatschenta 2015/16. Quai èsi vegnì communitgà oz a la radunanza generala da las ovras a Glion.

Lai da fermada a Sontga Maria/Lucmagn
Legenda: Lai da fermada a Sontga Maria/Lucmagn RTR, H. Giger

Las Ovras da Glion han producì 252,7 milliuns uras kilowatt – quai èn 14 % pli pauc che l’onn avant. Ils custs da producziun èn creschids per 0.13 raps per ura kilowat sin 3.93 raps. L'aua vegn dal lai da fermada a Pigniu e da la tschiffada d'aua a Tavanasa.

Ils acziunaris (Axpo Power Sa 85%, il chantun Grischun 10%, las vischnancas da concessiun Breil, Vuorz, Andiast e Glion) survegnan ina dividenda da 1,25 % sin il chapital d’aczias dad 50 milliuns francs. Plinavant paja l’Axpo 4.7 milliuns francs sco tschains d’aua e taglias a chantun e vischnancas da concessiun.Nov en il cussegl d’administraziun è il president communal da Breil Clau Schlosser.

Era las Ovras electricas Rein anteriur han producì pli pauc energia cun 724 milliuns uras kilowat. L’onn avant (2014/15): 984.1 milliuns uras kilowat. Ils custs da producziun èn creschids per 1.11 rap sin 4.59 raps. L'aua vegn dals trais lais da fermada Sontga Maria, Nalps e Curnera.

Ils acziunaris (Axpo Power SA 81.5%, chantun Grischun 10%, las vischnancas da concessiun Tujetsch, Mustér, Medel, Sumvitg, Trun, Breil 8.5%) survegnan ina dividenda da 1% sin il chapital d’aczias dad 80 milliuns francs. Plinavant paja l’Axpo 11.5 milliuns francs sco tschains d’aua e taglias al maun public.

RR novitads 16:00