Plievgia intensiva e gia uss pauca naiv. Ina situaziun pauc empernaivla per tut tgi che vuleva giudair bels dis sin pista sur ils firads da Nadal. Tuttina datti quels e quellas che na laschan betg starmentar da l’aura e che van era uschia sin pista.
La naiv vegn sulet sur 2’000 meters
Il territori da skis da Mustér cumenzà sin in'autezza da 1’850 meters sur mar. Uschia possian ins quintar che la gronda part dal territori da skis è gist sur il cunfin da naiv u almain gist al cunfin. Ma naiv pudess quai vertir anc blera, pertge fin uss n’han ins anc betg pudì avrir l’entir territori da skis, quai pervia da mancanza da naiv.
Sco il schef da pistas Otmar Venzin ha raquintà, hai pluvì la notg sin gievgia fin sin 2'700 meters sur mar. Las pistas sajan dentant anc adina en in bun stan. Tuttas n'èn dentant betg avertas. Per gliez avevi dà gia avant memia pauca naiv.
Privel da lavinas considerabel
L'institut da naiv e lavinas a Tavau annunzia per la gronda part dal Grischun in privel da lavinas considerabel, stgalim 3. Per la vart sanestra dal Rain anteriur sco era per las valladas talianas vala in privel da lavinas moderà, stgalim 2.
