Sco quai ch’il president da la Golf Sagogn-Schluein SA, Leo Cahtomas ha ditg, possian ins cun questa mesira eliminar la bilantscha deficitara ed era spargnar daners. Enfin ussa pajava la societad enturn 45’000 francs taglia sin interpresas, cun reducir il chapital d’aczias da 9'490'000 francs sin 4'745'000 francs, sa reduceschia era la taglia sin var 20’000 francs. Per pudair far quai pass hai duvrà ina radunanza generala extraordinaria d’acziunaris. Quels han approvà questa proposta dal cussegl d’administraziun senza discussiun.
Ulteriuras mesiras
En tut manca mintg’onn 400’000 francs en cassa da la societad. Perquai ha il cussegl d’administraziun preschentà als acziunaris ulteriuras mesiras che duain purtar var 200’000 francs en cassa. Sco quai che Leo Cathomas ha ditg vegnan las taxas per entrar en il Club da golf duain vegnir reducidas per la mesadad. Uschia vulan ins vegnir tar dapli commembers. «Nus quintain da survegnir tar almain 50 novs commembers, quai dess entradas supplementaras da bun 100’000 francs», di Leo Cathomas. Vinavant vulan ins laschar a tschains l’ustaria durant l’entir onn e na betg sco ussa be durant ils mais ch’il plaz da golf è avert, laschar a tschains parcadis ed optimar il menaschi.
Sustegn da vischnancas ed organisaziun turistica
Ils proxims tschintg onns duain las vischnancas da Flem, Laax, Falera, Sagogn e Schluein surpigliar ensemen cun la destinaziun da turissem Flem Laax Falera Management SA surpigliar 200’000 francs per onn. La destinaziun da turissem ha fatg valair sia cumpart da 100’000 francs da la decisiun da Sagogn e Schluein. Omaduas vischnancas han decidì a la radunanza communala da sustegnair la Golf Sagogn-Schluein SA cun 25’000 francs per onn. Laax e Falera han medemamain gia decidì da sustegnair cun 50’000 francs per onn. Glindesdi ils, 14 da december decida lura anc la vischnanca da Flem medemamain davart la summa da 50’000 francs.
Far amortisaziuns e cumprar chasa dal club
Cun tut questas mesiras quinta Leo Cathomas che la Golf Sagogn-Schluein SA sa revegnia fin 2021 e daventia fit. Uschia saia pussaivel d’amortisar ils emprests, remplazzar tschertas maschinas e na betg sco ultim crear ina reserva per lura cumprar la chasa dal club.