En in'emprima fasa duai la populaziun pudair porscher lur parcellas da construcziun a la vischnanca. Quai n’era oriundamain betg previs uschia. La suprastanza aveva proponì al cussegl communal da cumprar trais parcellas. Sin ina da quellas dueva quai dar ina surbajegiada cun abitaziuns da 5,5 e da 6,5 chombras. Sin ina parcella en il center dal vitg avess la vischnanca laschà en dretg da construcziun quella a famiglias giuvnas. La terza parcella fiss stada adattada per ina surbajegiada u per in project communal, scriva la suprastanza en il messadi.
Ma il cussegl communal n’ha betg sustegnì las propostas da la suprastanza cun l’argument che mintgina e mintgin cun ina parcella duai uss pudair porscher quella a la vischnanca, di Martin Cavegn il president communal.
Vischnanca vul evitar mancanza da suloms
Per la suprastanza saja impurtant d'evitar che famiglias giuvnas na chattan betg abitaziuns adattadas. Quai saja stà il cas la stad passada, cura che famiglias sajan returnadas en la val Tujetsch, di Martin Cavegn. In motiv supplementar saja ch'ils pretschs per suloms sajan creschids a moda exponenziala sur il pass Alpsu ad Andermatt. Indigenas ed indigens na possian quasi betg prestar d’acquistar quels, di Cavegn. Quantas dumondas che vegnian inoltradas saja da spetgar, ma els quintian cun intginas e lura valia quai d'evaluar ellas.
Dastga la vischnanca far quai?
Per la vischnanca saja quai legal da cumprar parcellas da construcziun, conferma l’Uffizi per il svilup dal territori. La vischnanca da Tujetsch haja inoltrà correctamain ina zona da planisaziun, quai saja il sulet ch’il chantun haja da controllar, tge che las vischnancas fan na saja betg lur chaussa, uschia il responsabel da l'uffizi Richard Atzmüller.