L’investider egipzian ha respundì curt ad ina dumonda durant ina dieta da turissem a Turitg. La Porta Alpina saja stada e saja ina buna idea.
Ma il pledader da Sawiris, Franz Egle, relativescha l’artitgel en la gasetta cun il titel: «Samih Sawiris vesa novas schanzas per la Porta Alpina». El haja telefonà cun ses schef suenter ch’el haja legì l’artitgel. L’investider egipzian haja ditg, ch’el saja fascinà da la rusna giuaden en il tunnel, il pli grond dal mund. Forsa pudess ins nizzegiar quella turisticamain per ch’ins vesess ils trens che passan speravi ubain organisar ina exposiziun en il tunnel.
El na vesia però betg la Porta Alpina sco staziun sutterana. Ins na possia betg impedir il traffic.
Betg pussaivel da construir la Porta Alpina
Era Marcus Weber che ha realisà in resort da vacanzas a Mustér è da la medema opiniun. El ha scrit curt ad RTR ch’i na saja pussaivel da construir la Porta Alpina. Quella na correspundia betg a l’idea dad ina colliaziun sperta dal nord al sid.
Regenza grischuna sto mussar colur
Ina rolla centrala en questa discussiun gioga il Parlament federal che decida sur da la politica da traffic en Svizra. Il cusseglier naziunal Martin Candinas fa part da la cumissiun da traffic. El di, ch’ins stoppia discutar cun las Viafiers federalas e cun l’Uffizi federal da traffic avant che ir memia spert en il parlament.
Impurtant è uss che la regenza grischuna mussa colur e declera, tge ch'ella vul far cun questa idea.
RTR actualitad 12:00