La Porta Alpina saja in'idea fascinanta, di Jon Pult. El è vicepresident da la cumissiun da traffic dal Cussegl naziunal. I saja dentant fitg difficil da vulair realisar quest project politicamain. La Neat saja vegnida construida per avair ina colliaziun effizienta dal nord al sid.
Las Viafiers federalas n'èn mai stadas in grond fan d’avair ina staziun amez quest tunnel.
Era il president da la cumissiun da traffic dal Cussegl naziunal Michael Töngi è sceptic, sch’ins duai vegnir puspè cun quest tema.
La finala ha quai da raschuns concretas encunter la Porta Alpina.
Stefan Engler, il president da la cumissiun da traffic dal cussegl dals chantuns, di che quest tema pudess vegnir il 2026 sin maisa dal Parlament federal en ils programs d’infrastructura da la viafier. Ed alura stuess ins respunder puspè dumondas sco:
Tgi s’occupa dal manaschi, tgi surprenda la responsabladad e co pon ins realisar oz quest project?
En Tujetsch speran pliras persunas che la Porta Alpina vegnia realisada insacura. I saja in bun project.
Ils politichers da la regiun e la regenza grischuna èn segir persuenter, ma la Viafier federala sto star davos quest project.
Ins vesa alura, sche la Confederaziun e la Viafier federala èn prontas da sa fatschentar cun ils detagls.
I na fiss betg mo in project per la Val Tujetsch u mo per la Surselva, quai fiss in magnet turistic per l’entira Svizra.
Quai fiss in’attracziun nunditga. Uss sper jau che la Porta Alpina vegnia, ma cura ch’ella vegn – segir betg oz e damaun.
RTR actualitad 07:00