Portas avertas en il center da transit a Laax – in success

Il requirents d’asil da Laax han envidà e la populaziun è vegnida.

Mezdi: Rustico ha bivgnentà

3:19 min, Actualitad dals 31.10.2016

Sonda en il Rustico a Laax: Davent da las 11 fin a las 3 suentermezdi èn las portas dil center da requirents d’asil stadas avertas. Dumbrà quantas persunas ch'èn vegnidas en visitas n'haja nagin, sco quai che Rita Mathis, la manadra dal center, ha detg ad RTR. La chasa saja dentant stada plaina trasora.

Scuntrada internaziunala pauc usitada

Ils visitaders han pudì vegnir a gentar cun ina cuschina internaziunala. Gest uschia sco il center sez è era. Persunas ord dudesch differentas naziuns vivan en quest center da transit. 15 dad els èn uffants e 71 èn persunas creschidas.

Pliras stanzas da quatter persunas eran avertas per ils visitaders. Bain inqual in è stà surprais quant stretga ch'ina stanza da hotel daventa cura che quatter persunas e tut lur possess ston avair plaz.

Laax ed il Rustico - in'istorgia muventada e muventonda

Il center da transit a Laax è vegnì avert il favrer 2015, quai suenter che Laax aveva sa dustà bunamain dus onns encunter quest center. Il di da portas avertas, ha mussà ch'ils dubis èn per gronda part svanids. Dals visitaders eran blers da Laax e dal conturn.

RR actualitad 12:00