L’artista Ester Vonplon che viva e lavura a Castrisch ha pudì crear l’emprim pac da posta d’art. E quel n’è betg mellen sco quai ch’ins avess pudì supponer. Il pac dad Ester Vonplon è blau – e da vesair èn muettas che sgolan designadas en alv. E pudair crear in pac da posta, saja quasi tuttina sco pudair crear ina marca postala. In’onur e gronda satisfacziun, di Ester Vonplon.
Posta ha tscherni l’ovra
La Posta ha dumandà pliras artistas ed artists che fan gia part da la collecziun d’art da la Posta, declera la manadra Diana Pavlicek. Ord da questas propostas hajan ins alura tschernì la meglra. E quella da Ester Vonplon, cun las muettas che portan il pac ora en il mund, saja il tema propi vegnì applitgà a moda visuala. E gist en quest temp dettia il pac da posta era anc speranza, accentuescha Diana Pavlicek.
L’emprima part d’ina seria
Il pac da posta pon ins cumprar a partir da glindesdi en las postas svizras. L’ediziun è limitada sin 40’000 pacs. Sche questa seria haja success, alura vegnian els a cuntinuar – ma il mument na possian ins anc betg propi dir quai, accentuescha Diana Pavlicek che maina la collecziun d’art da la Posta.
