Siglir tar il cuntegn

Header

Mussavias per sendas d'enviern.
Legenda: Trun promova las sendas da viandar er durant l'enviern. RTR, Gionduri Maissen
cuntegn

Preparaziuns stagiun d’enviern Dapli sendas da viandar per evitar fullas sin pistas

La destinaziun da Flem-Laax-Falera fa quitads co evitar che memia bleras persunas sa chattan sin pista. I saja l’emprima maxima da vegnir da sa tegnair vi da las prescripziuns uffizialas ed uschia er d'agir, di Andreas Gisler, il directur da turissem da la destinaziun. Els hajan percurschì ch’i dettia in basegn dad ir a viandar era durant l’enviern. Perquai hajan els signalisà da nov radund 140 kilometers vias da viandar.

Ins possia uschia viandar en regiuns bassas fin al cunfin dal guaud ed anc pli ensi per part. Quai saja ina mesira per pussibilitar al giast da far ina bella excursiun senza vegnir sut squitsch pervi da memia bleras persunas, di Gisler. Era ponderà hajan els d'illuminar ina part da las vias, ma qua sajan els anc vi da sclerir plirs puncts.

audio
Trun e Laax sa preparan sin la stagiun d'enviern
03:09 min, Actualitad dals 16.12.2020.
laschar ir. Durada: 03:09 minutas.

Trun cun via illuminada da viandar

A Trun porscha l’uniun Trun Turissem ina via da viandar era durant l’enviern. Uschia vegnia la senda d’art – ch'è per gronda part illuminada – tegnida averta. Els hajan ditg ponderà sche la purschida vegnia appreziada u tschertgada. La stad passada cun blers giasts er a Trun e la situaziun speziala haja la finala dà il stausch per realisar quai, di Esther Tomaschett, ina da las suprastantas da l’uniun. Els sajan persvas ch’il giast tschertgia explicit talas purschidas pli pitschnas e quai emprovian els da porscher.

Senda illuminada.
Legenda: La senda da viandar illuminada a Trun. Gionduri Maissen.

Vinavant dettia dapi blers onns ina buna collavuraziun cun «Trun Nordic» che fa la loipa, sco era cun il runal «La Péra» e la patinera, di Esther Tomaschett. Ed ina tala purschida modesta possia forsa attrair dapli giasts che normal, ma forsa era mussar la bellezza ch’ils giasts returnian alura era suenter quest temp spezial, di Esther Tomaschett.

RTR actualitad 12:00

Artitgels legids il pli savens

Scrollar a sanestra Scrollar a dretga