Siglir tar il cuntegn
cuntegn

Surselva President communal trametta lavurers a chasa

En grondas parts da la Surselva vala Sontgilcrest anc adina sco firà. Uschia era en la vischnanca da Glion. Ton pli pauc plaschair ha il president communal, Aurelio Casanova gì, ch’igl è vegnì lavurà en vischnanca durant il firà. Senza far lungas ha el perquai persunalmain procurà per ruaus.

La via avant Rueun, in vial e serrads la vegn construir la via nova
Legenda: Sin quest plazzal dal chantun avant Rueun è vegnì lavurà da Sontgilcrest. RTR, L. Livers

Che quai na resta betg ditg tschelà cura ch’i vegn lavurà sin via principala e cler. La fin finala è il president da la vischnanca da Glion, Aurelio Casanova, perusunalmain stà sin il plazzal ed ha fatg chalar da lavurar vi da la via chantunala.

Betg lavurà sapientivamain

Ils lavurers da la firma Somanini SA han cartì ch'il plazzal saja sin territori da la vischnanca da Vuorz, pia sin territori d'ina vischnanca refurmada.

La direcziun da la vischnanca da Glion avess la pussaivladad da dar in chasti a la firma che ha lavurà il firà da Sontgilcrest. Sco quai che Aurelio Casanova ha ditg a RTR, na vegnia quai plitost betg fatg, perquai che la firma n’haja betg fatg quai sapientivamain, mabain per sbagl.