Katrin Blumberg è dapi trais onns en suprastanza communala ed è l'unica dal gremi actual che vul e dastga cuntinuar en suprastanza. Per la dunna oriunda da la Germania posseda la politica communala ina tscherta fascinaziun.
Ins sa fatschenta cun problems e dumondas actualas ch'ins sto tractar e decider.
Talas dumondas e problems actuals davart ils quals i saja da decider, dettia actualmain avunda en la Foppa. Perquai saja ella sa decidida da candidar er per motivs da cuntinuitad.
Ragischs en il turissem
La cumpetenza da coc da la dunna, oriunda da la Germania è il turissem. Ella è cumpossessura e mainafatschenta d'ina interpresa ch'organisescha turas da riverrafting. L'enviern lavura ella per la scola da skis ed ella s'engascha sco mediatura independenta. Cun l'annunzia per la cumissiun turistica da Sagogn avant trais onns è ella lura gist vegnida elegida en suprastanza.
Sco presidenta communala vuless ella dar paisa al contact cun la populaziun. Sch'i saja però il giavisch che las radunanzas communalas vegnian fatgas per rumantsch, lura stoppia la glieud eleger insatgi auter. Malgrà ch'ella chapescha per part rumantsch na po ella betg timunar ina radunanza communala per rumantsch. Katrin Blumberg è però da l'avis ch'ella haja autras cumpetenzas che na sajan betg main impurtantas en la politica locala e la situaziun actuala.
Alexander Ernst vul porscher ina schelta
L'um oriund da Basilea deplorescha ch'i na dat actualmain betg propi infurmaziuns davart ils candidats e las candidatas per la proxima elecziun. Questa situaziun na saja betg prudenta per ils electurs e las electuras ed augmentia la stancladad da far politica. El giavischa perquai ch'ulteriuras candidaturas per las autoritads communalas da Sagogn vegnian publicas.
Democrazia viva da l'infurmaziun e betg communitgar candidaturas enfin la saira d'elecziun n'ademplescha betg quella cundiziun.
In uffizi communal n'ha il chemicher, biolog ed econom anc mai exequì. El è però s'engaschà per differents projects e per il sport en la vischnanca da Sagogn. Arrivà là è el avant set onns ensemen cun sia dunna, oriunda da Mustér ed ils trais uffants nà da Basilea. El ha lavurà en posiziuns directivas per l'industria da chemia a Basilea ed a Domat. Actualmain lavura el en in pensum parzial sco directur per l'industria da chemia e timunescha dasper in start-up en il chastè Löwenberg a Schluein. El fiss er pront da surpigliar in post en suprastanza sch'il nov president u la nova presidenta giavischass quai. Rumantsch chapescha el detg pulit, conceda dentant er ch'el stoppia tractar tematicas pli pretensiusas per tudestg.
Martina Beeli desista
Martina Beeli sto dar giu ses post en suprastanza pervi da la limitaziun dal temp d'uffizi. Quella limita vala però be per la suprastanza e lubiss ina candidatura per il presidi. Ella vul però sa focussar sin sia lavur en il sectur da sanadad.
Jau less plitost s'engaschar vinavant per il provediment da sanadad en Surselva e sco deputada en il Cussegl grond.
Martina Beeli spera dentant ch'i dettia avunda persunas en vischnanca che sajan prontas da surpigliar in a u l'autra incarica.
Il president partent Thomas Candrian dubita dentant ch'i reusseschia d'occupar tut ils posts vacants en suprastanza en ina suletta radunanza communala. Quai er sch'el haja survegnì signals positivs da persunas ch'èn prontas da star a disposiziun per la cumissiun da gestiun. La nova perioda d'uffizi cumenza il fanadur 2024.
