Siglir tar il cuntegn

Surselva Pretschs bass per laina chaschunan deficits tar vischnancas

La laina che vegn derschida en il chantun Grischun va per gronda part en l’exteriur. Dapi l’aboliziun dal curs minimal è il pretsch per la laina dentant 10 fin 20% pli bass. Pervi dals donns entras la naiv dal november passà datti dentant vischnancas che ston gugent u navidas vender laina.

Maschina forestala che rumescha laina derschida.
Legenda: Ina part dals 10’000 cubics laina derschida en la vischnanca da Mustér è gia vegnida rumida il november passà. mad

Ina da las vischnancas pertutgadas è la vischnanca da Mustér. Là ha la naiv derschì var 10’000 cubics plantas. Tenor il selvicultur da Mustér, Simon Cathomen, èsi uschia che var in terz da la laina è gia vegnida rumida e vendida il december passà. Il rest vegn prendì la primavaira e la stad or dal guaud e vendida lura. Simon Cathomen sto quintar ch’el survegnia var 10% pli pauc per la laina ch’el sto anc vender. «Igl è grev da dir, ma i pudess dar in deficit da 150’000 francs ». Contractivas cun ils cumpraders da laina n’ha el anc betg fatg. Quai vegn a capitar pir la primavaira.

Malsegirtad tar ils cumpraders

Leo Thomann da la Federaziun forestala dal Grischun SELVA suppona che las vischnancas e possessurs da laina che na ston betg, na fan nagins tagls da laina. Uschia teman era ils cumpraders da laina ch’els na survegnian betg laina dal Grischun. Leo Thomann di dentant che la SELVA saja en contact cun ils cumpraders per chattar soluziuns. Discurrì da pretschs n’hajan ins anc betg, ma ins haja motivà ils cumpraders ch’els cumprian vinavant laina dal Grischun.

Meglierar las structuras per pudair lavurar pli effizient

Damai ch’i vegn a dar pli pauca lavur tar ils impressaris forestals, quinta Leo Thomann era ch’i giaja a perder la lavur. Mo er las vischnancas stoppian optimar lur manaschis, saja quai cun metter ensemen ils manaschis da pliras vischnancas ubain era cun bajegiar bunas vias en ils guauds per pudair transportar la laina pli savens cun camiuns ord il guaud, empè da sgular ora quella cun helicopter.