Siglir tar il cuntegn

Header

cuntegn

Pretschs d'energia Entradas lucrativas per las vischnancas da la Cadi

Per las vischnancas da la Cadi han ils auts pretschs d'energia er avantatgs. Uschia quinta per exempel la vischnanca da Trun l'onn che vegn cun var 3 milliuns dapli entradas, grazia a questas entradas ha la vischnanca pudì sbassar il pe da taglia.

Vender energia sin il martgà liber

La raschun per questas entradas è che las vischnancas vendan lur energia da participaziun sin il martgà liber. Avant blers decennis, cura che las interpresas d'energia s'èn etablidas en Surselva, han la vischnancas da la Cadi survegnì la pussaivladad da sa participar a las ovras. Tenor il grad da participaziun han las vischnancas il dretg da retrair e vender energia da participaziun.

Dapi l'onn 2009 vendan las vischnancas lur energia cun success sin il martgà liber d'energia. Incumbensads da las vischnancas per questa vendita èn Ciril Deplazes, il mainafatschenta da l'interpresa Energia Alpina, e l'inschigner Walter Deplazes. Sco che l'inschigner ha ditg envers la FMR hajan els vendì energia per ina summa da bunamain 10 milliuns francs per il 2023. Er per il 2024 sajan las perspectivas per vender bunas.

Unic en il Grischun

Questa participaziun da las vischnancas a la vendita da l'energia è unica en Grischun. Ella n'è betg il medem sco ils tschains d'aua che bleras vischnancas survegnan. Quels èn simplamain ina indemnisaziun da las ovras per il dretg da duvrar l'aua. Sco che Walter Deplazes di envers las FMR, hajan er autras regiuns e vischnancas mussà interess per introducir in sumegliant sistem sco en la Cadi. Introducir quel na saja dentant savens betg pussaivel per motivs giuridics.

audio
Per tadlar: curt e cumpact
ord RTR Audio dals 27.12.2022.
laschar ir. Durada: 53 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga