Siglir tar il cuntegn

Surselva Prevenziun al suicidi: Il tema fatschenta la giuventetgna

La Giuventetgna Cadi organisescha ina discussiun da podium davart il suicidi tar giuvenils.

Ina persuna en in guaud cun tschajera
Legenda: I dovra blers facturs fin ch’in uman decida da far suicidi. Stefan Schwenke

Rumper il tabu e prevegnir a cas da suicidi tar giuvenils en la regiun, quai è la finamira da la Giuventetgna Cadi. Sco quai che la lavurera da giuventetgna Gabriela Cabalzar di, occupeschia il tema suicidi la giuventetgna - quai cunzunt sch’i capitia in tal en lur conturn.

L’impuls per questa discussiun da podium sajan stads ils dus cas da suicidi en Surselva da l’onn passà. Entras la lavur ed il contact cun la giuventetgna en la Cadi sentia ella che tals cas commuventian ils giuvenils e ch’in u l’auter saja fitg trist.

Sensibilisar

Cun tematisar il suicidi duain giuvenils vegnir sensibilisads da ponderar co ch'els van enturn cun auters giuvenils. Savens na sajan els betg conscients che sa participar en gruppa e far maltschec cun insatgi u scriver nauschas chaussas en las raits socialas sur d’insatgi, possia esser in da plirs facturs che possia manar in giuvenil tar la decisiun da far suicidi, declera Gabriela Cabalzar.

Ma era glieud creschida sto vegnir sensibilisada dad avair ureglias avertas. Giuvenils dettian signals e quels valia quai da recepir. Frasas sco «jau pos betg pli», «igl è uschè grev» u «jau na vi betg» possian esser in alarm. Lura saja da tschertgar il discurs. Tenor Gabriela Cabalzar discurrian els era, sch’els hajan il sentiment ch’els vegnian prendids serius.

Betg bagatellisar ils fastidis dals giuvenils

Giuvenils hajan problems che paran a glieud creschida piculezzas. Sche l’amicizia cun l’amia u cun l’ami saja ida en stgaglias, sche pensian ils creschids savens: quai è nagin problem. Ti es giuven, i dat anc blers auters e quai n’è betg uschè nausch.

Legende: Video Suicidi tar giuvenils abspielen. Laufzeit 2:55 Minuten.
Or da Telesguard dals 19.05.2016.

Sco Gabriela Cabalzar di, sajan quai dentant dramas per ils giuvenils. Vegnia latiers ina miserabla nota en scola, nauschs messadis via chats e raits socialas e gia saja quai avunda per in giuvenil u l’auter.

I saja mussà si che sch’ins discurria giudlonder, lura hajan ils giuvenils era la fidanza da discurrer cun insatgi ed ils giuvenils sappian che betg mo els hajan forsa ina crisa e che betg mo els hajan patratgs da prender la vita, di Gabriela Cabalzar. Perquai è ella era persvadida che discurrer davart il suicidi saja bun e n’animeschia absolutamain betg da far suicidi.

Discussiun da podium a Trun

La discussiun è , ils 18 da matg 2016, las 19.00 en sala da cultura (chasa da scola) a Trun.

A la discussiun fan part:

  • Thomas Lechmann, medi
  • Silvana Calanchina e Lucrezia Berther, psichiatria d’uffants e giuvenils
  • Marcus Corai, prevenziun criminalitad da giuvenils da la polizia chantunala
  • Gabriela Cabalzar, promotura da la lavur da Giuventetgna Cadi