Sco la ugadessa da la baselgia da Sogn Antoni ha ditg a Radiotelevisiun Svizra Rumantscha crodan adina puspè tocca da la liadira giu da la fatschada. Quai daventia adina pli privlus. Cunzunt sch’i avess da dar giu tocca pli gronda e tutgar ina persuna. La raschun che quai capita è in tetg cun crappa da Val che na tegn betg davent l’aua pli. Tenor Alexa Schuoler èsi da far giu il tetg e far si da nov la construcziun da lain che cumenza a smarschir. Quella vegn lura isolada e la plattas da crap puspè messa sin tetg. «Nus avessan gugent chattà in’autra soluziun, mo perquai che la baselgia stat sut protecziun da monuments chantunala e federala stuain nus puspè far si il tetg cun la crappa da Val.»
Era la fatschada sto vegnir sanada. Quella ha era patì. I vegn quintà cun custs da 65’000 francs. Sustegn datti da la protecziun da monuments. Vinavant quinta Alexa Schuoler era da pudair recaltgar inqual donaziun. Ina brev correspundenta è vegnida repartida en la vischnanca da Mustér. Lura vegn era dumandà a la radunanza da la plaiv per in credit. Sche tut va tenor plan duain las lavurs vegnir fatgas primavaira.
Sin la perdunanza da Sogn Antoni, ils 12 da zercladur 2016, avessan las lavurs dad esser terminadas. Uschia ch’ils parochians che fan part a la perdunanza na ston betg temair da survegnir insatge giu per il chau, cura ch’i van en u vegnan ord baselgia.