Siglir tar il cuntegn

Header

cuntegn

Prix Benevol Grischun 2022 Repair Café Cuira vegn undrà sco prestaziun excellenta

L'organisaziun Benevol ha surdà il Prix Benevol 2022 ad in project da voluntaras e voluntars en la citad da Cuira. Ma er l'Uniun Staziun Lavin e la gruppa d'agid Solidaritad cun l'Ucraina a Mustér èn vegnidas undradas.

L'otgavel Prix Benevol Grischun va al Repair Café. 15 voluntarias e voluntaris repareschan en quel gratuitamain objects da tut il gener, a Cuira a la Gäuggelistrasse. Cun quai sustegna il Café in tractament persistent da l'ambient, scriva Benevol Grischun en ina communicaziun da medias.

Benevol è in'organisaziun nunguvernamentala ed in post d'intermediaziun per lavur voluntara. Mintg'onn surdat ella in premi per prestaziuns voluntaras e gratuitas excellentas en il Grischun. Il Repair Café Cuira gudogna en la Categoria Persistenza. Purtar san ins apparats electronics, velos u er vestgadira, tenor la communicaziun da medias.

In premi da renconuschientscha va a l'Uniun Staziun Lavin en la Categoria Innovaziun. L'uniun haja cuntanschì dad «enritgir e dar vita a la val muntagnarda». Il Premi spezial 2022 va a la gruppa d'agid Solidaritad cun l'Ucraina a Mustér. La gruppa haja organisà alloschis, rimnà daners ed accumpagnà las fugitivas ed ils fugitivs. Er sch'il sistem d'alloschis è vegnì midà dal chantun suenter sajan trais famiglias alura restadas Mustér.

audio
Per tadlar: curt e cumpact
ord RTR Audio dals 04.12.2022.
laschar ir. Durada: 59 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga