Siglir tar il cuntegn

Header

cuntegn

Surselva Pro e contra tempo 30 a Cumbel e Degen

In'iniziativa inoltrada cun 170 suttascripziuns vul abolir il tempo 30 en las fracziuns da Cumbel e Degen. Questa iniziativa va dumengia en votaziun.

Gnanc 2 onns èn passads dapi che las vischnancas da Cumbel e Degen han introducì tempo 30 en parts da lur vitgs. Fatg han ellas quai anc avant che fusiunar a la vischnanca Lumnezia. Ussa duai questa decisiun d’antruras vegnir abolida entras in'iniziativa. Gist quest fatg che las anteriuras vischnancas han introducì il tempo 30, è in dals pli ferms arguments da betg abolir il tempo 30, quai manegia Pius Elvedi, in convischin da Cumbel ch'è s’engaschà per il tempo 30.

La culpa da la depopulaziun

Ils iniziants fan responsabel il tempo 30 per la depopulaziun da la val. Nagin n'haja interess d'abitar en Lumnezia, sch'ins stoppia charrar cun tempo 30 atras tut ils vitgs. Il tempo 30 saja mo per incassar chastis e per schicana, din ils iniziants.

Da l’autra vart èsi d'udir che gist il tempo 30 saja attractiv per las vischnancas per abitar.

Betg uschè simpel

Sch'ils Lumnezians acceptan l'iniziativa d'abolir il tempo 30 a Cumbel ed a Degen, na po quai betg vegnir fatg simplamain uschia, cun demontar las tablas. Il proceder è il medem sco cura ch'ins ha introducì il tempo 30. I dovra ina expertisa cun ils novs arguments pertge abolir tempo 30, lura dovri era ina deliberaziun da la cumissiun chantunala, e la finala ina decisiun dal departament chantunal.

In gea è pia mo in gea per instradar la procedura per abolir il tempo 30 entaifer la vischnanca Lumnezia. In na vuless dir ch'il tempo 30 resta en las fracziuns da Degen e Cumbel.

Artitgels legids il pli savens