Pro Flem-Cassons: Tranter museum, pendiculara nova e nagut pli

Radund 130 dals 2'300 commembers e donaturs èn stads preschents a l'otgavla radunanza generala da la Pro Flem-Cassons ed èn sa laschads infurmar tranter auter era davart l'idea per in museum a Cassons.

Sisum Cassons. Bild in Lightbox öffnen.

Legenda da maletgs: Sisum Cassons: La Pro Cassons na vul betg ceder uschia spert da questa vista sur la val ora. Keystone

La Pro Flem-Cassons ha stuì registrar l’onn passa enturn 300 extradas or da l'uniun. Il motiv è tenor il president Arno Krucker, ch'ils commembers èn trumpads ch'i n’è betg reussì da salvar la pendiculara.

Donaturs han pretendì enavos radund 120'000 francs

Ina reducziun hai er dà tar il conto da donaziuns. Radund 120'000 francs èn vegnids pretendids enavos dals donaturs, uschia ch'i resta anc strusch 940'000 francs sin quest conto.

Las donaziuns èn vegnidas fatgas per salvar la pendiculara da Cassons. Damai che quest intent n’è betg pli pussaivel, vegnan ils donaturs infurmads sch’ils daners pudessan vegnir duvrads per in auter project. Els ston lura decider sch'els surlaschan ils daners era per il nov intent u sch’els vulan enavos els.

In museum ord la staziun da la pendiculara

Arno Krucker, president da la Pro Flem-Cassons Avrir maletg en lightbox.

Legenda da maletgs: Arno Krucker, president da la Pro Flem-Cassons RTR; Gion Hosang

Or da las retschas da la Pro Flem-Cassons è vegnida l’idea da far da la staziun da l’anteriura pendiculara a Cassons in museum. Quai betg sco ultim era per pudair mantegnair ina da la cabinas, declera Arno Krucker. Perquai haja l’uniun giavischà da l’Arena Alva SA, ch’ella dumondia la confederaziun da stuschar il termin per disfar il bajetg per dus onns.

Temp per realisar museum è restrenschì

L’Uffizi federal da traffic ha dentant mo dà temp fin mez 2018 da preschentar in concept valabel per funcziunar enturn il bajetg sco museum. Sche quai na grategia betg sto il bajetg vegnir stgarpà giu. La suga ed las pitgas vegnan actualmain gia demontadas, ha ditg Martin Hug da l’Arena Alva SA.

Var 130 persunas èn stadas a la radunanza generala da la Pro Flem-Cassons. Avrir maletg en lightbox.

Legenda da maletgs: Var 130 persunas èn stadas a la radunanza generala da la Pro Flem-Cassons. RTR; Gion Hosang

Sco emprim vegnian ussa la vischnanca da Flem, l’Arena Alva SA e la Pro Flem-Cassons a vegnir ensemen per sclerir tge ch’è pussaivel. Discurri na vegn betg mo d’in museum mabain tranter auter era d’ina chamona en il senn da las chamonas dal SAC.

Preparativas ed examinaziun per la nova pendiculara

Igl è era vegnì infurmà davart il stan da las lavurs preparatoricas en connex cun la pendiculara futuristica che maina da Flem directamain a Cassons. Sco quai che Martin Hug di sajan ins vid preparar quai ch'i dovria per la revisiun da la planisaziun dal territori – quella è necessaria per pudair realisar la pendiculara. Sch'i va tut tenor plan duai il pievel da Flem decider davart questa en la secunda mesadad dal 2018.

Parallel sajan ins vid far las examinaziuns tecnicas dad ina tala pendiculara. La Pro Flem-Cassons sustegn l'idea da realisar questa pendiculara. Tenor Arno Krucker saja da sperar che questa vegnia realisada per uschia puspè arrivar a Cassons. L'alternativa saja d'avair nagut.

RR novitads 06:00