Avant 20 onns era quai finì cun la via a Tschamutt ed a Fuorns en Val Medel. Per megliurar quella situaziun ed era per carmalar dapli gists nà dal sid en la regiun da skis da Sedrun-Mustér han plirs iniziants sustegnì l’avertura dal Pass dal Lucmagn durant l’enviern. Ma per realisar quai, hai duvrà lavur da persvasiun. Sco Walter Decurtins, anteriur deputà e cusseglier naziunal, ha raquintà, hajan ins l’emprim stuì persvader il cusseglier guvernativ grischun Luzi Bärtsch. Lez n’èra l’entschatta insumma betg persvas che quai saja pussaivel. Ma cun bleras discussiuns saja el stà pronts da discurrer cun ses collega d’uffizi tessinais, Marco Borradori. E lez saja stà averts per far quai pass. Quai haja la finala fatg surstar tuts.
Midar la lescha da protecziun
Sin la vart tessinaisa saja stà l’emprim necessari da midar la lescha da protecziun. Quai saja alura succedì suenter blers discurs ed era visitas sin la vart tessinaisa dal Pass dal Lucmagn, raquinta Walter Decurtins. Ma cura che tut saja stà atras, saja surtut il contact cun la Val dal Blegn stà en buna memoria e quai saja era ina da las finamiras da rinforzar ils contacts culturals ma era economics tranter las duas valladas periferas. E quai contact vegnia anc rinforzà surtut era cun la gruppa da lavur dal barat cultural che duai metter dapli impuls ils proxims onns.
Replantaziun sto uss vegnir
Surtut sin la vart dal sid fa quai basegn che la replantaziun sur Aquacalda vegn realisada. Il proxim ha il Cussegl grond dal chantun Tessin da tractar la fatschenta ed alura approvar ils 13 milliuns francs necessaris per realisar las mesiras da protecziun. Dapi passa 10 onns sajan ins uss vida discutar sur da quellas mesiras da la vart dal sid dal Lucmagn, di Martin Candinas, il president actual. Uss stoppia finalmain vegnir mess fil en guglia per realisar quai project ed uschia tegnair avert pli savens il Pass dal Lucmagn che fin uss.
Matteo Baggi ha chalà suenter 22 onns en suprastanza
Il vice-president da l’uniun, Matteo Baggi, è sa retratg da ses uffizi. Quai quai suenter ch’el è stà en suprastanza dapi l’entschatta. El saja persvas che tut las stentas dals ultims onns hajan purtà fritg. Uschia saja quai tut normal per ses uffants dad ir cun skis en Surselva, ni era da frequentar il gimnasi da la claustra da Mustér. Uschia saja ina da las finamiras da la Pro Lucmagn cuntanschidas gia suenter 20 onns, quai vul dir da megliurar la colliaziun tranter las duas valladas la Surselva e la Val dal Blegn. Sco vice-president nov è vegnì elegi Loris Beretta, ch’è en ina funcziun da sviluppader regiunal en las regiuns da las «Valli».
