En il chantun Grischun datti 52 cussegliaders locals da privels da la natira. Els han da tegnair en egl en lur vischnanca u regiun ils lieus privlus da bovas, lavinas, inundaziuns euv. Ils cussegliaders datti dapi 2013. Davent da lura porscha il chantun Grischun era scolaziuns per els.
Per barattar experientschas è vegnì organisà ina scolaziun a Sedrun. Là ha il cussegliader local da privels da la natira da Tujetsch, Adrian Deragisch, declerà a ses collegas tge ch’el ha tut gì da far pervi da la bova ch’è ida a val la primavaira passada en la Val Strem.
Dapli material vegn anc a val
Igl è numnadamain cler ch’i vegn anc dapli material a val. Perquai ha Adrian Deragisch gì da far in concept. Quel definescha quant savens ch’i dovra controllas e nua. Mo era tge che sto tut vegnir protocollà regularmain. Uschia vegn adina protocollà l’aura e sch’i dat grondas plievgias vegn persequità l’aual che vegn ord la Val Strem. I è dentant era stà da definir nua ch’ils lavurers dastgan lavurar en la val e co i vegn avertì en cas ch’i avess da sa distatgar material.
Ils participants han laschà plaschair la scolaziun. Els possian profitar da questas infurmaziuns en cas ch’i avess da capitar insatge sumegliant en lur vischnanca, han els ditg a RTR.
In cussegliader per mintga vischnanca
Il chantun da sia vart vul scolar vinavant cussegliaders locals da privels da la natira. L’idea è tenor Urban Maissen da l’Uffizi da guaud e privels da la natira, che mintga vischnanca, u pliras vischnancas ensemen, hajan in tal cussegliader. Fin 2017 saja quai il cas tar 70% da las vischnancas dal chantun.
RR actualitad 17:00