Siglir tar il cuntegn

Header

audio
«Incubatur» turistic San Gottardo: Surdada da 2 premis innovativs
Or da Actualitad dals 13.01.2023. Maletg: RTR
laschar ir. Durada: 4 minutas 19 Secundas.
cuntegn

Program San Gottardo Or d'ideas datti projects turistics

Il program «San Gottardo» ha lantschà la stad il project incubatur turistic. L’idea è da rimnar ideas ed alura sviluppar ellas communablamain tar in project turistic. Trais projects èn vegnids premiads.

Il dumber da 20 projects inoltrads è stà in grond success, di il mainafatschenta Dieter Bogner. 10 da quels projects èn alura vegnids sviluppads cun in coach extern ch’ha gidà da metter sin palpiri l’idea.

Las ideas èn vegnidas preschentadas a Sedrun e trais ideas èn vegnidas premiadas d’ina giuria ed han survegnì in sustegn da 5’000 francs. Naginas da las trais ideas èn stà or da la Surselva.

Ina senda culinarica

Las trais ideas premiadas na vegnan betg direct or da la Surselva, pudessan dentant era vegnir realisadas en la regiun. Uschia è l’idea per ina senda culinarica en la regiun dal Gottard vegnida undrada. Planisà è ina senda nua ch’ins po giudair spezialitads regiunalas en la gastronomia locala ed emprender dapli da la cultura regiunala. Il project vegn testà en il Goms ed en il chantun Uri.

Il segund victur vegn ord il chantun Tessin e vul far accessibels ils mirs da serra a moda turistica. Ed il terz project ch’ha survegnì in premi vegn medemamain or da il chantun Tessin e vul porscher aventuras cun mountainbike, cumbinà cun durmir en il liber a moda speziala.

Las ideas or da la Surselva vegnan era cuntinuadas

Da las 10 ideas preschentadas eran quatter or da la Surselva.

  • Ina da quellas è en Stussavgia e duai stgaffir ina correlaziun tranter l’agricultura ed la cultura. Realisar las sentupadas en stallas veglias vul Johannes Hediger, il promotur da l'Art Safiental.
  • Il segund project vul plazzar saunas en butschins da lain dasper il «Lag da Claus» u il Rain en val Tujetsch. Quest project vegn realisà da Gioia Linth. Ella tschertga anc persunas che vulessan manar las saunas.
  • Il terz project vegn ord da l’agricultura. Sin il bain puril da Christine Casanova e Richard Arnold a Tschamutt duai dar entupadas e spassegiadas cun chauras. Quai saja in'entrada supplementara, sper il bain puril.
  • Il quart project da Remo Eberle vul colliar ils acturs da bike en l’entira regiun dal Gottard per porscher al giast purschidas da mountainbike.

Naginas ideas da «wow»

Las ideas preschentadas èn tuttas pussaivlas da realisar entaifer curt temp. Pliras da quellas han da far cun il sport da bike, autras porschan in eveniment spezial. Propi in'idea ch’avess procura per battacor mancan dentant. Quai conceda era il mainafatschenta Dieter Bogner. Forsa vegnian quellas alura tar ils proxims projects.

Per il program San Gottardo èsi cler ch’els veglian cuntinuar cun il project incubatur e tschertgar vinavant ideas. Sco proxim veglian ins sa focussar sin in'autra vista, per exempel sin aua ubain cultura, di il mainafatschenta. Il mument sajan els vid sclerir intginas chaussas, per exempel sch’il sustegn dals chantuns purtaders, Vallais, Tessin, Uri e Grischun vegnia era sur il 2023. Els hajan survegnì dals chantuns purtaders l’incumbensa da lavurar ora in nov program da realisaziun per ils onns 2024-2027 ed alura vegnian ils chantuns a decider co agir vinavant. Dieter Bogner quinta dentant ferm ch’il project «San Gottardo» cuntinueschia era ils proxims onns.  

RTR actualitad 12:00

Artitgels legids il pli savens

Scrollar a sanestra Scrollar a dretga