La producziun da chaschiel chaura en Val Medel va per il mument a fin. Ma quai saja stà dapi l’entschatta sulet in provisori. Ils iniziants dal project, l’uniun «La Caura», han era numnà il bajetg il labor per far emprimas experientschas, declera il vicepresident da l’uniun Giusi Flepp.
Planisà era quai dentant auter
Il plan era da pudair rimnar las experientschas, ma era da pudair realisar pli svelt ina chascharia nova, declera Giusi Flepp. Qua sajan ins stà memia optimistic, conceda el. Il manaschi d’ina chascharia haja sa mussa sco fitg cumplex. Vinavant veglian ils cumpraders gronds da chaschiel gugent gronda variaziun ed ina furniziun constanta sur l’entir onn or – ina da las grondas sfidas dal project.
Ins haja dentant er fatg grondas experientschas, manegia Giusi Flepp. Ins haja per exempel constatà ch’il product da latg chaura saja atgnamain tschertgà.
Project actual vegn en segunda fasa
Il mument sajan ins perquai vida tschertgar furniturs da latg ord l’entira regiun ed era d’elavurar in concept da business per ina chascharia pli gronda. Quai saja uss la segunda fasa dal project sin basa dal svilup regiunal, che duai vegnir approvà proximamain dal chantun e la Confederaziun. Purtar l’entir project stoppian la finala ils purs. Sche lez veglian ina chascharia e mussian interess da furnir latg, alura fiss ina emprima badigliada pussaivla la primavaira 2021, di Giusi Flepp.
RR actualitad 12:00
