Siglir tar il cuntegn

Surselva Project «star bein» per residenza da seniors a Sedrun

Per la residenza da seniors a Sedrun che la fundaziun PUNTREIS planisescha da bajegiar, è la giuria sa decidida per il project “star bein” dal biro d'architectura Schaufelbühl Ruf.

Visualisaziun da la residenza da seniors a Sedrun.
Legenda: Visualisaziun da la residenza da seniors a Sedrun. Schaufelbühl Ruf Architekten / visualisaziun: Gabor Gyenese

Sco quai che la fundaziun communitgescha, è planisada ina chasa cun 4auzadas e 20 abitaziuns da 2½ e 3½ stanzas a Dulezi. I sa tractia d’in bajetg cumpact prest quadratic, che sa cunfetschia cun ils bajetgs en la vischinanza. La construcziun ord lain empermettia ch’ins possia laschar far la lavur en la regiun, ha scrit la fundaziun PUNTREIS.

Visualisaziun d'ina abitaziun.
Legenda: Visualisaziun d'ina abitaziun. Schaufelbühl Ruf Architekten / visualisaziun: Gabor Gyenese

Ils contracts necessaris

Ils architects quintan cun custs da 9 milliuns francs. La fundaziun saja ussa en contractivas cun investiders pussaivels. Ils contracts quinta la fundaziun da pudair suttascriver las proximas emnas.

Medemamain èsi da far in contract per dretg da bajegiar cun la vischnanca da Tujetsch. La vischnanca da Tujetsch da sia vart vegn a construir sut la residenza ina garascha sutterana cun 35 parcadis. Quella vegn colliada cun la garascha sutterana dals bajetgs da la Banca chantunala ch’èn gist dasperas.

RR Novitads 22:00