Siglir tar il cuntegn
Inhalt

Surselva Punt tranter Sagogn e Valendau è puspè averta

Tenor ina infurmaziun da la vischnanca Stussavgia è la punt sur il Rain tranter Sagogn e Valendau puspè averta permanent per tut traffic.

La punt dasper la staziun Valendau-Sagogn è sanada.
Legenda: La punt dasper la staziun Valendau-Sagogn è sanada. RTR, L. Livers

Davent dad oz, ils 15 da november avantmezdi da las 10:00, è la punt sur il Rain anteriur tranter Sagogn e Valendau puspè averta permanent. Las lavurs da sanaziun èn gia vegnidas terminadas la fin october, ils davos dis han dentant anc las punts stuì vegnir allontanadas e per far quellas lavurs ha la punt stuì vegnir serrada singuls dis.

La paisa maximala per vehichels vegn auzada da 9 sin 18 tonnas.
Legenda: La paisa maximala per vehichels vegn auzada da 9 sin 18 tonnas. RTR, L. Livers

La punt d’atschal da 61 m lunghezza che maina davent da la staziun da la Viafier Retica Valendau-Sagogn sur il Rain anteriur en direcziun da Sagogn, è vegnida construida l’onn 1903. Perquai che la plaunca da la vart da Valendau ruschna, è la punt vegnida stuschada sur ils onns 20 cm en direcziun da Sagogn. Quai moviment ha chaschunà donns che han stuì vegnir pinads uss.

La punt tutga a la Viafier Retica, che ha era pajà la sanaziun, ina sanaziun che ha cuzzà circa 1 onn e custà 1,8 milliuns francs. Suenter la sanaziun duess la punt puspè tegnair 60 enfin 70 onns e la paisa maximala per vehichels vegn auzada da 9 sin 18 tonnas. Cun la fin da las lavurs da sanaziun va la punt en il possess da las vischnancas Stussavgia e Sagogn, quai en connex cun la meglieraziun generala. La surdada uffiziala da la punt a las vischnancas succeda damaun gievgia, ils 16 da november.


Ord l'archiv

Legende: Video La punt tranter Valendau staziun e Sagogn vegn sanada abspielen. Laufzeit 03:19 Minuten.
Or da Telesguard dals 05.04.2017.