Siglir tar il cuntegn

Header

cuntegn

Surselva Purschida per remplazzar pendiculara da Cassons a Flem

L'access al fil da Cassons è impurtant per pudair far reclama cun l’arena tectonica Sardona, in patrimoni cultural mundial da l’UNESCO. Per il mument datti mo la pussaivladad d'ir a pe sin il fil da Cassons.

audio
Bunura: Mesiras per la prima stad senza pendiculara Cassons
ord Actualitad dals 07.04.2016.
laschar ir. Durada: 2 minutas 46 Secundas.

La pendiculara da Cassons a Flem è vegnida serrada l'atun passà per adina. Uschia èsi mo pli pussaivel d'ir a pe sin il fil da Cassons.

Enfin ch'ils novs implants da transport sin il fil (la varianta «Y») n’èn betg construids, resta quai uschia. Quai vegn probablamain a durar 4 fin 5 onns.

Shuttle a Nagens e Graubergbahn

Sco quai ch'il directur da turissem da Flem André Gisler ha confirmà ad RTR, èsi planisà da laschar cursar il bus da shuttle Nagens mintga di da l’emna e betg mo da mesemna enfin dumengia. Quest bus va da Laax Murschetg fin la staziun sura da la sutgera Nagens. Era la Graubergbahn duai esser en funcziun durant la stad per megliurar l'access a l’arena tectonica Sardona.

Nov pavigliun d’infurmaziun

Plinavant èsi planisà in nov pavigliun d’infurmaziun sur da l’arena tectonica Sardona gist sper la tegia Segnas, ina tegia dal Club Alpin Svizzer che sa chatta gist a l’ur da l’arena tectonica. Quel duai remplazzar il post d’infurmaziun che sa chattava en la staziun da muntogna da la pendiculara Cassons.

Artitgels legids il pli savens