Suenter discussiuns intensivas las emnas passadas disponia la vischnanca uss dad ina proposta concreta per in project da sanaziun da las pendicularas Val S. Pieder.
Vischnanca duai desister da pretensiuns
Il concept da sanaziun cumpiglia in'entira seria da mesiras per sanar las pendicularas: Uschia prevesa el, che la vischnanca desista da sias pretensiuns envers las pendicularas e ch'ella dà ina garanzia per las amortisaziuns restontas envers terzs.
Vischnanca duai sustegnair pendicularas onn per onn
Dapi la primavaira passada ha il cussegl da vischnanca sclerì differents models. En il fratemp ha el decidì da preschentar a la populaziun quel model, ch'era vegnì preschentà quella giada sco model 2 «Gadastatt included».
Tenor quel duaja la vischnanca contribuir mintg'onn 900'000 francs a la gestiun, scriva la vischnanca en sia communicaziun a las medias. Per la paja duaja il diever da la pendiculara Gadastatt esser gratuita per tuts ed insumma l'ir culs skis vegnir pli favuraivel: Cartas dal di datti per 33 francs, abunaments da stagiun per 333 francs.
Vischnanca duai augmentar per quai las taglias
Finanziar vul la vischnanca quel model cun in augment da la taglia sin immobiglias da 1% sin 2%, ina nova taxa d'alloschi che duai remplazzar la taxa da cura actuala e cun la summa or dal budget general.
Ensemen cun questa sanaziun è planisà, da finanziar il marketing da turissem cun ina nova cunvegna da prestaziun, scriva la vischnanca.
Vischnanca vul simplifitgar las structuras existentas
Sche la radunanza communala da Val Son Pieder decida ils 12 d'october in Gea per la proposta da la vischnanca, vul quella prender per mauns anc quest onn las structuras existentas e, sche pussaivel, unir las pendicularas, Visit Vals e la cumissiun da marketing.
Il cussegl da vischnanca sa mussia persvas da questa proposta cun quai ch'ella spordschia la pli buna basa pussaivla per manar vinavant il territori da skis ed il turissem sur onn a Val.
RR novitads 17:00+
