Christine Egerszegi, l'anteriura presidenta dal Cussegl naziunal, ha elegì il titel da ses referat «Quant dastga murir custar?» ed ella ha vulvì quella dumonda, cun dumandar: «Quant dastga viver custar?» Ord vista politica è quai reglà uschia, che mintgin da nus ha dabun la tgira ch'i dovra per sia sanadad. Qua vegn pia mintgin sez dumandà quant vul e quant dovras. Studis mussan che mintgin da nus chaschuna ils davos dus onns da sia vita ils pli blers cust per la sanadad. Quai emporta betg sche ins mora cun 40 ni pir en auta vegliadetgna. Quel da 40 onns dovra en cas da malsogna simplamain dapli medicaments chars e quel en auta vegliadetgna dovra dapli tgira. Mo i resta tar la pretensiun: Ils davos dus onns èn ils pli chars.
La disposiziun da pazients
I dat ina pussaivladad da tenair quests cust a mastergn, pretenda Christine Egerszegi. Quai è la disposiziun da pazients. In med ch'è in agid per parents, per ils medis e la tgira. Sche il pazient declera sez, tge mesiras ch'el vul per prolungar la vita e tgeninas betg. Quella disposiziun sto il pazient far cura ch'el è anc abel d’agir e da discutar quai cun ils parents ni enconuschents che manglassan la finala exequir quella disposiziun.
Era la SanaSurselva e Palliative Care Surselva, che han organisà il referat cun Christne Egerszegi, fan adina puspè attent la populaziun da far ina disposiziun da pazients.