Siglir tar il cuntegn

Header

cuntegn

Surselva «Quei ei in schenghetg nundetg»

Martin Demont ha pudì turnar suenter 7 emnas a chasa tar sia famiglia, suenter ch’el è vegnì infectà cun il virus FSME entras ina morsa d’ina zecca.

audio
Saira: Martin Demont è vegnì infizà d'ina zecca cun il virus FSME
ord Actualitad dals 15.07.2016.
laschar ir. Durada: 4 minutas 1 Secunda.

Trais emnas en spital e quatter emnas en ina clinica da reabilitaziun a Valens ha Martin Demont duvrà per sa revegnir almain in pau da la morsa d’in zecca a Trun. La zecca ha infectà el cun il virus FMSE ( Frühsommer-Meningoenzephalitis). Quest virus ha chaschunà ina inflammaziun da la paletscha dal tscharvè. Dapi bun in’emna è el puspè a chasa. I dovra dentant anc pazienza. Cun ina chomma e la pesentincla haja el anc in pau miserias, declera Martin Demont. Ils medis hajan dentant prognostitgà ch’i vegnia puspè bun.

Per la famiglia da Martin Demont èsi stà in grev temp. Cunzunt per sia dunna Rita Demont, ch’era per il pli en spital tar ses um, èsi magari strusch stà supportabel da guardar co ses um aveva mal, malgrà tut ils medicaments. Mo cun il sustegn da ses uffants, da parents ed enconuschents haja ella tegnì ora quai. La speranza haja la famiglia dentant mai dà si.

Novitads positivas hai dà per l’emprima giada pir il 6avel di en spital. Quai saja stà in grond levgiament, di Rita Demont. Cura che ses um saja vegnì alerta ed haja enconuschì la famiglia, saja quai stà per ella il pli bel mument. «Quei ei in schenghetg nundetg», di Rita Demont. I avessi pudì vegnir tut auter, per exempel che ses um avessi stuì star en sutga da rodas. Era Martin Demont ha in qual giada ponderà co quai fiss sch’el na vegniss betg pli dad ir. La terapia en la clinica da reabilitaziun saja stada fitg dira, mo ussa saja el sin buna via. I dovria simplamain pazienza.

Infurmaziuns davart zeccas

Artitgels legids il pli savens