In inserat en la gasetta «Tages-Anzeiger» fa attent sin l'ingiant da quai maletg da gronda impurtanza per Flem, per la regiun, gie forsa perfin per il Grischun. Il maletg cun il num «Panorama da Flem» vegn valità sin 2 fin 3 milliuns francs. Il maletg tutga tar l'inventar da l'hotel Waldhaus che la firma americana Z Capital Partners ha cumprà il december 2015.
Il tripticon da Giovanni Giacometti è d’immensa impurtanza perquai ch'i sa tracta d'in maletg ch'è vegnì fatg en incumbensa da l'hotel Waldhaus per il hotel Waldhaus. Quai di Beat Stutzer, l'anteriur directur dal Museum d'art dal Grischun e curatur dal museum Segantini a San Murezzan.
I fiss ina gronda sperdita, sch'il maletg da Giacometti bandunass la regiun. Ina sperdita per la cultura da hotels, per Flem e per il Grischun, perquai che Giovanni Giacometti saja in dals pli impurtants artists ch'il chantun Grischun haja gì.
Il tripticon da Giacometti è gia a Turitg. Sch'el chatta anc ina giada la via enavos el hotel Waldhaus n'è betg cler. Dal manaschi dal hotel Waldhaus na ha nagin vulì prender posiziun pertutgant l'avegnir dal maletg da Giacometti.
