La Regiun Surselva ha tramess in questiunari en las chasadas da la regiun. Cun quel vul ella eruir l’opiniun dals indigens a partir da 16 onns, dals possessurs dad abitaziuns secundaras u da persunas che s’interesseschan per la Surselva. Las dumondas principalas èn:
- Co lain nus viver e lavurar en l’avegnir en Surselva?
- Co po la regiun daventar pli attractiva?
La finamira saja da sviluppar mesiras ch’ins possia alura discutar cun las vischnancas, di il manader dal project Avegnir Surselva e sviluppader regiunal Ruedi Büchi.
Impurtant è che nus n'avain betg mo projects economics sco sviluppar il turissem.
Gruppa accumpagnanta surveglia il project
L’organisaziun veglia era lavurar cun uniuns ubain resguardar la cultura e la scola. Il questiunari che duai rimnar passa 20’000 opiniuns è in emprim pass. En in segund vegnan furmadas gruppas da lavur. En ina fasa finala duain las ideas e visiuns vegnir concretisadas.
Dapli infurmaziuns
Per ch’il project na restia betg mo sin il palpiri, vegn quel accumpagnà d’ina gruppa cun persunas che s’engaschan gia en Surselva. Uschia possian ins evitar ch’i dettia ideas che na sajan betg realisablas, ch’ins na possia betg finanziar ubain che na sajan betg cumpatiblas cun la politica e cun las structuras dal chantun e da las vischnancas.