L'onn passà ha il Spital regiunal Surselva fatg in gudogna da passa 1,7 milliuns francs. Il retgav staziunar è s'augmentà grazia a tractaments staziunars ed importa var 16,6 milliuns. Quai correspunda ad ina svieuta pli gronda da radund 12,8%, pia passa 2,3 milliuns dapli, cumpareglià cun l'onn avant. Er en il sectur ambulant è la svieuta s'augmentada per 5,4% sin passa 10 milliuns francs.
Sco l'ospital scriva en sia communicaziun saja questa gronda differenza tar l'onn 2020 da declerar cun il scumond da la Confederaziun dal 2020 per tractaments betg urgents durant la pandemia. Er tar ils ulteriurs retgavs hajan ins fatg dapli svieuta. Quai haja sur tut da far cun las vaccinaziuns da Covid-19 dal 2021.
Investiziuns da material
Durant l'onn da gestiun 2021 saja er stà pussaivel d'investir radund 1,46 milliuns. Ins haja remplazzà material e cumprà novs instruments medicinals per radund 300'000 francs. Er il project da renovaziun progredeschia.
Sin buna via
L'avegnir da l'ospital regiunal saja positiv, concluda il rapport annual dal cussegl d'administraziun. Ins saja sin buna via da cuntanscher las finamiras da manaschi. Er l'onn 2022 valia da reagir a moda flexibla sin midadas e novas situaziuns en consequenza da la pandemia.
