Che quai è succedì ha cunzunt ina raschun, declera il president da la suprastanza transitorica da la nova Pleiv Sumvitg fusiunada, Walter Deplazes.
La tgira da monuments haja pretendì ch’ils altars laterals vegnian puspè mess en la baselgia sco antruras sche la plaiv veglia survegnir il sustegn da 150’000 francs. Tenor Walter Deplazes na saja la situaziun finanziala da la plaiv fusiunada betg uschè buna ch’ins possia discutar giudlonder.
Decidì da prender ora
Tar la sanaziun 2001 era vegnì decidì entras il parochian ed encunter la veglia da l'uvestgieu e da la tgira da monuments da betg pli metter en baselgia quests altars suenter la sanaziun. Uschia n’aveva quai lezza giada era betg dà daners per la sanaziun.
Tar la radunanza da la plaiv 2014 èsi lura vegnì infurmà ch’i dovria ina sanaziun dal tetg e da las fatschadas ed era anc tschertas lavurs da sanaziun internas. En quest mument èn ils parochians vegnids infurmads ch’ils altars vegnian puspè mess enavos en baselgia.
Lura aveva quai dà naginas discussiun. Perquai na spetga Walter Deplazes era betg ch’i dettia ussa ch’ils altars èn montads, grondas discussiuns pli pervia da quai.
La sanaziun custa var 1,1 milliuns. Il tetg e las fatschadas è gia vegnids sanads. Proxim onn datti anc ina sanaziun en l’intern. Là vegn il stgaudament adattà ed i sto vegnir schubregià e colurà ils mirs e l’arvieut.
RR actualitad 12:00