Il december passà èsi vegnì enconuschent che las cavernas a Rueun èn contaminadas cun Radon, in gas natiral radioactiv nuschaivel. Las mesiraziuns han mussà che las valurs surpassan per part 5 giadas la concentraziun lubida per lieus abitads. La vischnanca da Glion ha interess da l'areal dal militar a Rueun. Ella vul numnadamain stgaffir là ina zona da mastergn.
Pli bun martgà grazia al Radon?
Tge munta quai per in'eventuala vendita da quellas localitads? Tenor la pledadra da medias dal Departament federal da defensiun, protecziun da la populaziun e sport (DDPS) Jacqueline Stampfli, ha il DDPS fatg quella mesiraziun per pudair metter avertamain sin maisa ils resultats en cas d'ina vendita. Che quellas mesiraziuns hajan in'influenza sin il pretsch da cumpra valitescha Jacqueline Stampfli uschia: «Ellas èn senz’auter era in factur cura ch’i va per eruir il pretsch da cumpra per quels stabiliments.» En nagins cas vegni il militar a sanar quellas cavernas, quai na saja betg prevì.
Vischnanca na vul era betg sanar
Sco quai che Aurelio Casanova, il president da vischnanca da Glion ha ditg a RTR, fetschia ina sanaziun era pauc senn. Las cavernas sajan plitost quintadas sco deposits ni magasins, uschia ch'il problem da Radon n'haja betg prioritad. Casanova manegia schizunt che cun duvrar pli intensiv las cavernas, possia l'aria circular meglier e quai pudess perfin megliurar la situaziun da Radon.
RR actualitad 12:00
