La vischnanca vul bajegiar ina chasa da pliras famiglias per indigens ed indigenas a Cons. Cunter quai project hai dà paucas vuschs da las 200 abitantas e abitants a la radunanza communala. Il project prevesa 10 abitaziuns da 4 ed ina mesa stanza, 8 abitaziuns da 3 ed ina mesa stanza ed anc 4 abitaziuns da duas ed ina mesa stanza. Il project è dotà cun 8,8 milliuns francs, esser a fin duaj la chasa da pliras abitaziuns sin l’atun 2024. Ils tschains da locaziun duain esser adequats.
Scumond absolut per fieus artifizials
Cun ina iniziativa avevan radund 160 votantas e votants giavischà in scumond absolut per fieus artifizials sin intschess communal. En ina cuntraproposta da la suprastanza fissan fieus artifizials vinavant stà lubids tar la midada da l’onn e da la festa naziunala dal prim d’avust. Las votantas e votants han decis en favur da l’iniziativa ed uschia scumandà fieus artifizials senza excepziuns.
Revisiun da la planisaziun locala ha dà discussiun
Pervia da las leschas federalas e chantunalas sto ins reveder la planisaziun locala. Uschia è vegni infurmà a la radunanza communala. Ins possia lasuenter nizzegiar las reservas existentas da la zona da construcziun, ma er enzonar ulteriuras parts. Surtut en il quartier da Cons duajan uschia ils proxims onns vegnì bajegiadas ulteriuras chasas d’ina famiglia sco era chasas da pliras abitaziuns.
Cun la revisiun èsi uss pussaivel a la vischnanca da realisar il nov plan da quartier. Tut las premissas sco per exempel l’access pon vegnì regladas. Surtut il fatg che zonas da construcziun ston vegnir surbajegiadas ils proxims 8 onns ha dà da discutar. La finala è la revisiun vegnida approvada cun paucas cuntravuschs.