Per laschar ir lur uffants en la canorta spetgan ils da Flem il mument prest in onn. Per meglierar la situaziun engrondescha la vischnanca la canorta. La radunanza communala ha approvà in credit da 300'000 francs per engrondir il bajetg existent. Uschia po la canorta tgirar 18 enstagl da 12 uffants per di.
Glista da spetga bler memia lunga
La canorta d'uffants a Flem vegn menada da l’uniun «Canorta Igniv». Quella uniun maina sper la canorta a Flem era las canortas a Glion ed a Laax. Mo otg onns suenter l'avertura è la canorta ussa memia pitschna. Enfin ussa pudevan las trais canortas da Glion, Laax e Flem gidar in l'auter sch’i deva en in lieu problems da dumagnar tut ils uffants sut tetg. Ussa sa mussa la mancanza da plaz ellas canortas en l'entira regiun.
Per part portan geniturs da Glion lur uffants a Mustér en la canorta per suenter turnar a Glion a lavurar. La mancanza da plaz en las canortas pertutga ussa l’entira regiun.
Per augmentar la purschida engrondescha la vischnanca da Flem ussa sia canorta existenta. Far pli grond las localitads schlia dentond mo ina part dils problems. La mancanza da persunal dal fatg è in'ulteriura sfida. Per pudair occupar tut ils plazs supplementars dovri era pli bler persunal.
La dumonda dal persunal è prest ina pli gronda sfida che l'engrondiment da la canorta.
Las lavurs da bajegiar per engrondir la canorta entschaivan durant las vacanzas da stad ed enfin igl atun 2023 duessan ils uffants pudair far diever da la nova localitad.
Trutg dil Flem
Sper il credit per engrondir la canorta ha la radunanza communala da Flem era approvà in credit da 330'000 francs per il project «Trutg dil Flem». La senda da viandar duai vegnir prolungada davent dal center da Stenna fin il Lag la Cauma.
Ovra termoelectrica cun laina
Sper l'approvaziun dal quint dal 2022, che serra cun in gudogn da var 200'000 francs tar entradas da 40 milliuns francs, ha la suprastanza anc infurmà davart projects che vegnan en avegnir en votaziun davant il pievel. Tar quels tutgan ina nova lescha da polizia e la revisiun da la planisaziun locala per adattar las zonas da bajegiar. Quella fiss necessaria per construir in'ovra termoelectrica da laina a Prau Pultè. L'ovra pudess stgaudar parts da Flem e da Laax cun ina rait da distanza.