La radunanza communala da Val S. Pieder ha concedì venderdi saira in credit da 770'000 francs per sanar in tract da la chasa da scola. Tar quest project sa tracti d’ina renovaziun da las stanzas da duas auzadas. Las ulteriuras parts da la scola vegnan sanadas pli tard.
Stanzas da 1965
La finamira da quella renovaziun è d’unir trais stanzas da scola en duas e da stgaffir tranteren mintgamai in’oasa d’emprender per las scolaras ed ils scolars. Là pon els lavurar il temp senza instrucziun. Fanestras en las stanzas da scola pussibiliteschan a las scolastas ed als scolasts da survegliar ils uffants e giuvenils. Igl è previs da sanar e structurar las sis stanzas da scola durant las vacanzas da stad. Quella part da la chasa da scola è vegnida construida il 1965. Dapi lura èn las stanzas vegnidas meglieradas sulettamain cun novas portas, illuminaziun e fanestras. En il rom da la renovaziun sin rucca vegnan remplazzads ils palantschieus, sanads paraids e palantschieus sura sco era cumpletà las stanzas cun stgaffas, mobigliar, lavabos cun aua chauda, stgaudament, storas, illuminaziun e tablas interactivas.
Plinavant ha il suveran da Val S. Pieder approvà in credit da 526'000 francs per sanar l'avertura da la via Leisalp ed er concedì 90'000 francs per remplazzar il bajetg da la serenera Mont.