Siglir tar il cuntegn

Header

Navigaziun

Legenda: Guardar il video Raiffeisen Cadi serra trais filialas. Durada 02:39 minutas.
Or da Telesguard dals 10.02.2016.
cuntegn

Surselva Raiffeisen Cadi investescha a Trun e Sedrun

En l’avegnir concentrescha la Banca Raiffeisen Cadi sia purschida sin Mustér, Sedrun e Trun. A Sedrun e Trun vul la banca investir 2-3 milliuns francs. Quai ha il directur da la Banca Raiffeisen Cadi Alfons Quinter confirmà.

Il cussegl d’administraziun da la banca decidia da cas tar cas sch’ina filiala vegnia serrada. Ina fusiun cun la Banca Raiffeisen Tumpiv saja in tema en l’avegnir, dentant anc nagut concret il mument, uschia Alfons Quinter. Ed i saja era grev da dir tge che l’avegnir portia, surtut era per las Bancas Raiffeisen Cadi e Surselva.

Filialas a Sumvitg, Surrein e Curaglia vegnan serradas

Vista da l'entrada da la filiala da la Banca Raiffeisen Cadi a Curaglia.
Legenda: La filiala da la Banca Raiffeisen Cadi a Curaglia. RTR, H. Giger

La banca Raiffeisen Cadi serra filialas a Sumvitg, Surrein e Curaglia. Quai ha il cussegl d’administraziun decidì. Las trais filialas vegnan serradas ils 30 da zercladur 2016. Il motiv saja ch’ils servetschs da banca sco retrair ni pajar en daners sajan sa sminuids considerablamain ils ultims onns, scriva la banca a ses clients. Dal 2009 fin il 2015 saja il dumber da transacziuns sa sminuì per passa in terz.

Servetschs restan

La Banca Raiffeisen Cadi porscha dentant vinavant cussegliaziuns persunalas, era ordaifer il temp d’avertura (07:00 – 19:00) e sin giavisch era a chasa tar il client. A Sumvitg pon ins retrair ubain pajar en daners al spurtegl da la chanzlia communala. Ed il bancomat a Sumvitg resta en funcziun. Retrair daners pon ins era tar las stizuns dal vitg a Surrein ed a Curaglia.

Mo pitschnas midadas tar il persunal

Tar il persunal datti mo pitschnas midadas, scriva la banca vinavant. In collavuratur va en pensiun, ils dus auters pon restar tar la banca.

Il favrer datti sairas d’infurmaziun a Curaglia (15.02.16 / 20:00), Sumvitg (16.02.16 / 20:00) e Surrein (18.02.16 / 20:00).