Actualmain ha la banca Raiffeisen Surselva circa 7'400 commembras e commembers.
La radunanza generala è mintgamai in grond eveniment, che ha lieu dapi onns en la halla da curling a Flem, perquai che lezza è il sulet lieu en l’intschess da la banca che ha plaz per tantas persunas.
Questa radunanza custa mintg'onn var 70’000 francs, custs che la banca vul spargnar en l’avegnir.
Votaziun en scrit
A la proxima radunanza generala dals 11 da zercladur propona il cussegl d’administraziun a las commembras ed als commembers ina midada tar il sistem da la radunanza generala. La radunanza generala fisica duai vegnir abolida e las votaziuns respectiv elecziuns necessarias duain succeder en l’avegnir mo pli en scrit per posta ubain en l’internet. Ils statuts da la banca lubeschan ina tala midada da la procedura a partir da 500 commembras e commembers.
Daners en favur d’artists indigens
Sche la radunanza generala accepta la proposta dal cussegl d’administraziun, vegn gia la proxima radunanza generala dal 2017 ad esser ina radunanza virtuala. Cun ils 70’000 francs che la banca spargna uschia, duai vegnir organisada ina saira culturala Surselva cun artistas ed artists ord la regiun.
RR actualitad 07:00