La lingia d’auta tensiun tranter Tavanasa e Tujetsch vegn sanada. Perquai è il provediment d’electricitad per la part sura da la Surselva limitada sin la lingia da la Repower. La consequenza è stada ch’il current electric era crudà ora per trais uras en las vischnancas da Tujetsch, Medel e Mustér. La Swissgrid ha sinaquai immediat interrut las lavurs e pussibilità ch’il current electric ha chattà la via sur duas lingias en la regiun.
Ma auters incaps n’hai betg dà, declera il mainaproject Bernard Willy. Las lavurs vegnan bain vinavant ed il pli impurtant è d’avair nagins accidents. Las proximas emnas vegnan lura anc fatgas lavurs cun helicopters e sin la fin zercladur è la sanaziun da la lingia ch’ha 60 onns finida. Tenor il pledader da medias da la Swissgrid, Joshu Jullier, è planisà sco proxim da dar colur a tuttas pitgas, gliez stoppia vegnir fatg mintga radund 30 onns.
Lingia da 60 onns
Vegnida construida è questa lingia il 1961 e perquai basegna quai pliras lavurs da mantegniment, declera il mainaproject da la Swissgrid, Rafael Martin Roso. Per vegnir da far svelt las lavurs è il tschancun vegnì partì en quatter parts, las lavurs vi da quellas han cumenzà suenter Pasca. En tut vegnan radund 80 lavurers ad esser ils proxims mais vi da la lavur. Quellas duajan esser a fin sin la fin da zercladur e custan a la Swissgrid radund 7,5 milliuns francs, declera Rafael Martin Roso.
Las pitgas vesan ora tuttina suenter las lavurs
Las lavurs sajan surtut per remplazzar struvas ed auter material. Era vegnan las chadainas remplazzadas e cun quai vegn la distanza da las lingias cun la terra era pli auta, quai che vegnia probabel a purtar in meglierament per las vischinas ed ils vischins, declera il mainaproject da la Swissgrid. Tar tschertas pitgas vegnan els era a stuair far lavurs pli grondas, era cun helicopter. Quellas lavurs vegnan reducidas sin in minimum e coordinadas cun la surveglianza da chatscha per minimar il disturbi.
Nagin auzament da la forza
La lingia existenta è ina lingia da 220 kilovolts. Il mument na vegnia la forza da questa lingia betg augmentada, declera il pledader da medias da la Swissgrid Joshu Jullier. Las ovras solaras planisadas era en Surselva beneventa la Swissgrid, dentant na vegnian las lavurs per la rait il mument betg discutadas. Per pudair augmentar talas lingias dovria lubientschas che basegnan lung temp fin ch’ellas èn prontas, savens dapli che las lubientschas per las ovras, declera Jullier. Da principi stoppia mintga ovra nova dumandar lubientscha per dastgar duvrar la rait. Suenter possian ins dir co la rait stoppia vegnir meglierada. Il mument sajan els dentant gia en la planisaziun e realisaziun da la strategia 2024, declera Joshu Jullier.
