Siglir tar il cuntegn
Inhalt

Surselva Raschuns dal Na al Parc Adula èn enconuschentas

I na dat betg mo ina suletta raschun per il Na al Parc Adula. Quai mussa in studi da l'universitad da Turitg ch’ha intercurì il resultat da la votaziun d'avant dus onns. Il Na haja pliras raschuns, ha ditg Norman Backhaus da l’universitad da Turitg al schurnal regiunal da Radio SRF.

Il clutger baselgia da Vrin.
Legenda: Vrin ha giugà ina rolla impurtanta encunter il parc Adula. RTR, Linus Livers

Il studi constatescha che regiuns ch'han il sentiment ch'i giaja gia bain cun ellas, han plitost ditg na, constatescha Norman Backhaus da l'universitad da Turitg.

I dat betg ina raschun ch'ha manà al Na dal parc Adula. I dat pliras raschuns.
Autur: Norman BackhausProfesser a l'universitad da Turitg

In'autra raschun encunter il Parc Adula è stada ch'ils adversaris avevan il sentiment che questa idea saja dictada da Berna e betg creschida en la regiun. Il studi che cumpara proximamain duai mussa las raschuns daco che la glieud era per u cunter il parc.

Dumandà tut las vischnancas pertutgadas

Il studi na duai betg esser in recept da cuschinar per tals projects, manegia Norman Backhaus. Tuttina possian ins emprender co far meglier ed evitar sbagls. Il studi è vegnì fatg avant in onn cun in questiunari en las 17 vischnancas sin l’intschess dal Parc Adula. Passa 1’400 persunas han respundì las dumondas, ultra da quai ha l'universitad era fatg passa 40 intervistas cun persunas responsablas. Il november 2016 avevan 8 da las 17 vischnancas refusà l'idea dal Parc Adula che fiss lura stà il segund parc naziunal en Svizra.

RR novitads 17:00