Siglir tar il cuntegn

Header

Giovanni Wieland avant il studio da RTR a Mustér.
Legenda: Giovanni Wieland, lavura sin il bajetg e vegn numnà là «Obama». RTR, Gionduri Maissen
cuntegn

Rassissem en il Grischun «Uffants na vesan betg colur – quai è ina dumonda dals geniturs»

Enavos en l’Africa dal Sid na vul Giovanni Wieland betg ir. A far vacanzas e visitar sia famiglia gea, ma betg ad abitar. Quai malgrà che sia mamma e ses bab èn returnads avant circa dus onns en l’Africa dal Sid. El haja qua ses collegas e qua saja el sa disà, di l’um da 28 onns.

Avair pel stgira n'è betg simpel

El n’haja en l’uffanza betg resentì rassissem. Uschia n’hajan ses conscolars betg vilentà el pervi da la colur da la pel. Sulet cun il pled ch’ins na duai e dastga betg dir, haja quai dà problems. Ma la finala haja el ditg a sasez, ch’el na saja betg pertutgà da quest pled ed uschia possia el ignorar quel, di Giovanni Wieland. Ma cun las controllas per exempel sin la plazza aviatica, vida quellas na vegnia el betg a sa disar. L’emprim eria quai anc legher, ma cun il temp saja quai sulet malempernaivel. Vid il num u vid il pass dependia quai betg, quai haja da far sulet cun la pel e quai saja rassissem, di Giovanni Wieland.

Sin il bajetg vegn el numnà «Obama»

Ma impurtant saja d’avair ina pel dira e da pudair laschar ir d’ina ureglia en chaussas e da tschella anora. Quai haja el emprendì gia da l’entschatta. E mai dar si, saja era impurtant, di l’um. Quai saja ina tenuta ch’el haja emprendì ed en Svizra possia mintgin vegnir da realisar ils siemis, ma engaschi, gliez dovria quai da tuts. Ed el veglia restar en Svizra e sch’el haja ina famiglia – lura era en Surselva, u meglier ditg a Mustér. Qua saja ideal per uffants, ma ina amia n’ha el anc betg. Emporta era betg tge colur da pel ch’ella ha, cura ch’igl è stgir èn tuts nairs, di Giovanni Wieland cun in surrir.

RTR actualitad 08:00

Artitgels legids il pli savens

Ir a sanester Ir a dretg