Siglir tar il cuntegn

Header

Sanester ina gronda ruschnera e chasas da vacanzas davos
Legenda: Il vitg da Reka a Mustér. Davant sanester la tur cun la ruschnera e davos las chasas da vacanzas. RTR, G.Hosang
cuntegn

Surselva Reka fa midadas vid plaz da gieu pervi da canera

Ina gruppa da possessurs d’abitaziuns da vacanzas che sa chattan sper il plaz da gieu da la Reka a Mustér han reclamà pervi da la canera. La Reka fa ussa differentas adattaziuns per diminuir las emissiuns da canera.

I na saja betg singulas chaussas che disturbian, mabain la cumulaziun da tuttas caneras, declera Rolf Wagner. El è il represchentant dals 15 proprietaris d’abitaziuns da vacanzas sper il plaz da gieu da la Reka che sa sentan mulestads da las caneras. Sco Rolf Wagner di saja quai dad ina vart il giatter da fildarom dal plaz da ballape che fetschia canera cura ch’ils uffants sajettian nunstanclentaivlamain la balla en quest. Ubain lura la tur cun la ruschnera ch’è in grond bischen da sturs nua ch’i na vegnia betg mo ruschnà giuadora, mabain era laschar rudlar crappa ed auter giuadora ni fatg diever dal bischen sco megafon. Ni lura era la tur culs zains che suna da temp en temp entiras melodias.

Nagins pass giuridics

Tut quai ha motivà Rolf Wagner da tschertgar il discurs cun il manader dal vitg da vacanzas da la Reka a Mustér. Quai dentant senza success. Perquai ha el laschà far ina expertisa giuridica che mussa la finala che la procedura da la lubientscha da bajegiar per il plaz n’è betg stada dal tut correcta. Tenor Rolf Wagner existia nagin plan da la tur cun la ruschnera che haja ina autezza da 9 meters, mabain mo ina skizza. Rolf Wagner è lura i cun questas infurmaziuns tar ils responsabels a Berna.

Reka è pronta da megliurar la situaziun

Daniel Pfister il vicedirectur da la Reka e responsabel per ils vitgs da vacanzas ha laschà declerà la situaziun. Tenor el èsi pussaivel da far tschertas midadas. Uschia per exempel da barattar il giatter da fildarom dal plaz da ballape cun ina rait ubain da laschar resunar ils zains be paucas giadas. Ils auters puncts stoppian els anc analisar e lura tschertgar soluziuns.

Rolf Wagner è uschè lunsch cuntent cun las stentas da la Reka. El saja cuntent ch’ils proprietaris d’abitaziuns da vacanzas enturn il plaz da gieu vegnian prendids serius e perquai desista el da pass giuridics.

Artitgels legids il pli savens

Scrollar a sanestra Scrollar a dretga